ஓட்டப் பந்தய சாம்பியனான விஷ்ணு (ஆதி பினிசெட்டி) சாலை விபத்தில் தனது காலை இழக்கிறார். அவர் தகவல் தொழில்நுட்பத் துறையில் பணிபுரியும் தனது மனைவி மித்ராவுடன்(ஆகாங்ஷா சிங்) மந்தமான வாழ்க்கையை நடத்துகிறார். ஒரு நாள் விஷ்ணு, பாக்யலட்சுமி (கிருஷ்ண குருப்) என்ற மாநில அளவிலான ஓட்டப்பந்தய வீராங்கனையைப் பற்றி அறிந்து கொள்கிறார். அவளால் ஈர்க்கப்பட்ட விஷ்ணு, பாக்யலக்ஷ்மியை அணுகி, தேசிய அளவில் பங்கெடுக்க பயிற்சி அளிக்கிறார். இதற்கிடையில், SAA தலைவர் வெங்கட்ராம் (நாசர்) விஷ்ணுவுக்கு ஒரு பெரிய தடையை உருவாக்குகிறார். வெங்கட்ராம் மற்றும் விஷ்ணு இடையே நடந்தது என்ன? பாக்யலட்சுமி தேசிய சாம்பியன் ஆனாரா? என்பதுதான் கதை.
பொதுவாக, விளையாட்டு சார்ந்த திரைப்படங்கள் ஒரே மாதிரியான பின்னணியைக் கொண்டிருக்கும். அதில் கிளாப் விதிவிலக்கல்ல. ஆனால், விஷ்ணு தனது பிரச்சினைகளை சமாளித்து பாக்யலட்சுமியை இறுதிப் போட்டியில் வெற்றிபெறச் செய்த விதம்தான் படத்தைப் பார்க்கச் செய்கிறது. ஆதி ஒரு கால் ஊனமுற்ற விளையாட்டு வீரராக சிறப்பாக செயல்பட்டுள்ளார். கிருஷ்ண குருப்பும் ஒரு கண்ணியமான நடிப்பை வெளிப்படுத்தி இருக்கிறார். நாசர் தனது சிறந்த நடிப்பின் மூலம் மீண்டும் முத்திரை பதிக்கிறார்.
தேர்வின் போது நடக்கும் அரசியலை யதார்த்தமாக காட்சிப் படுத்தியிருக்கிறார் இயக்குனர். காட்சியமைப்பும் இசையும் சுவாரஸ்யம்.
மொத்தத்தில், கிளாப் ஒரு யூகிக்கக்கூடிய விளையாட்டு திரைப்படம்.
